Inflacioni i tetorit 2.3 për qind, udhëhequr nga rritja e çmimit të qirave
INSTAT: Inflacioni ra në 2.3% në tetor, por qiratë dhe kostot e banesës po rriten më shpejt.
Inflacioni vjetor zbriti lehtë në 2.3% në tetor, nga 2.4% në shtator, por jetesa po bëhet më e shtrenjtë për familjet me banesë me qira, pasi grupi “Qira, ujë, lëndë djegëse dhe energji” dha ndikimin më të madh me +0.87 pikë përqindje dhe u rrit me 4.3% kundrejt tetorit 2024.
Shtyrja e blerjes së apartamenteve për shkak të çmimeve të larta dhe zgjerimi i qirave ditore kanë ulur stokun për qira afatgjata, duke rritur çmimet sidomos në Tiranë dhe në zonat bregdetare; në sektorët pranë qendrës rritja vlerësohet deri në 30% dhe gjetja e apartamenteve nën 400 euro brenda vijës së verdhë është bërë shumë e vështirë.
Qiratë po udhëheqin rritjen e kostove të banesës
Rritja e kërkesës për strehim dhe zhvendosja e pronave drejt qirasë afatshkurtër kanë rritur presionin mbi tregun e qirave afatgjata. INSTAT konfirmon se komponentët e banesës (qira, ujë, energji) kanë kontribuar më shumë në inflacionin e tetorit, duke tejkaluar ngadalësimin e indekseve të tjera.
Tirana, mungesë stoku dhe çmime më të larta
Kërkesa e lartë në kryeqytet, veçanërisht pranë qendrës dhe zonave të preferuara për qira ditore, ka ngushtuar ofertën. Në shumë raste qiratë mujore për apartamente 1+1 kalojnë 400 euro, ndërsa zonat pranë qendrës kanë shënuar rritje deri në 30%.
Deloitte: Të ardhurat nga qiratë u rritën me ~10% në 2024
Sipas një raporti të “Deloitte” për 28 shtete europiane, të ardhurat totale nga qiratë në Shqipëri arritën rreth 350 milionë euro në 2024, rreth 10% më shumë se një vit më parë; kërkesa nga turizmi afatshkurtër shtyu qiratë me ~20%, me 1+1 në Tiranë në intervalin 500–800 euro në muaj (rreth 8–12 euro/m²).
Ushqimet vijojnë të shtrenjtësohen
Grupi “Ushqime dhe pije joalkoolike” ndikoi inflacionin me +0.55 pikë përqindje; brenda tij u rritën “Vajra dhe yndyrna” me 4.9%, “Qumësht, djathë dhe vezë” me 4.2%, “Mish” me 2.9%, “Peshk” me 2.5% dhe “Bukë e drithëra” me 0.3%. Rritje u panë edhe te “Mobilie dhe mirëmbajtje shtëpie” (+0.21 p.p.), “Pije alkoolike dhe duhan” (+0.15 p.p.), “Hotele, kafene dhe restorante” (+0.13 p.p.), ndërsa “Argëtim dhe kulturë”, “Veshje dhe këpucë”, “Shërbimi arsimor”, “Transporti”, “Komunikimi” dhe “Shëndeti” kontribuan me rritje më modeste.
